Պոզիտիվ հոգեթերապիա

Պոզիտիվ հոգեթերապիան կարճատև հոգեթերապևտիկ մեթոդ է, որի կենտրոնում անձի փոփոխությունն է իր տրանս-մշակութային առանձնահատկություններով:

Մեթոդի հիմնադիրն է բժշկության դոկտոր, պրոֆեսոր, հոգեբանության, հոգեթերապիայի, նյարդաբանության ոլորտների մասնագետ Նոսսրատ Պեզեշկիանը (Գերմանիա): Նա ծնվել է Իրանում 1933թ-ին: Հոգեթերապևտիկ կրթությունը ստացել է Գերմանիայում, Շվեցարիայում և ԱՄՆ-ում:

Մեթոդն իր անունը ստացել է "Positum" լատ. բառից, որը նշանակում է տրված, փաստացիորեն առկա: Այս մեթոդը Ն. Պեզեշկիանը սահմանում է իբրև հոգեթերապիայի հումանիստական, խորքային հոգեբանորեն կողմնորոշված մեթոդ՝ տրանս-մշակութային մոտեցմամբ, այցելուակենտրոն և կարճատև հոգեթերապիայի ռեսուսների վրա կողմնորոշված, նոր տեխնիկաներով (Ն. Պեզեշկիան 1995, 1996): Գերմանիայում` պոզիտիվ հոգեթերապիայի հայրենիքում, այս մեթոդը ընդգրկված է կիրառման համար երաշխավորված 10 հիմնական հոգեթերապևտիկ մեթոդների շարքում:

Պոզիտիվ հոգեթերապիան հիմնված է ավելի քան 20 մշակույթների տրանսմշակութային ուսումնասիրությունների վրա և հանդիսանում է նոր մեթոդ, նոր մոտեցում մարդու հանդեպ:

Հետապնդում է հետևյալ հիմնական նպատակները`

• Բուժում (հոգեթերապևտիկ ասպեկտ).
• Դաստիարակություն և կանխարգելում (մանկավարժական ասպեկտ).
• Միջմշակութային գիտակցության զարգացում (տրանս-մշակութա-սոցիալական ասպեկտ) և տարբեր հոգեթերապևտիկ ուղղությունների փոխներգործություն և ինտեգրացիա (միջդիսցիպլինային ասպեկտ)

Պոզիտիվ հոգեթերապիայի մեթոդը հիմնվում է 3 սկզբունքների վրա, որոնցից յուրաքանչյուրին համապատասխանում է որոշակի մեթոդական բաղադրիչ`

Հույսի սկզբունքին համապատասխանում է դրական մոտեցում` մարդու ընդունակությունները և հնարավորությունները դիտարկելիս.

Հավասարակշռության սկզբունքին համապատասխանում է անձի հոգեդինամիկայի բովանդակային տարբերակված վերլուծություն, որի արդյունքն  է մարդու առաջնային և երկրորդային ընդունակությունների ներդաշնակեցումը.

Ինքնաօգնության սկզբունքին համապատասխանում է 5-քայլով մետամոդելը, որը  հենց գործընթացի սկզբում օգտագործվում է որպես անձնավորության ներդաշնակեցման, ադապտացիայի և զարգացման ռազմավարություն, հետագայում մարդու՝ իրեն, իր շրջապատի, ընտանիքի, կազմակերպության և հանրության ինքնաօգնության գործընթացում:

Մեթոդը օգնում է.

• հավաքագրել մարդու ռեսուրսները` դրական որոշումներ ընդունելու համար, սովորեցնում է չպայքարել շրջապատող միջավայրի հետ, այլ ընդունել այն:
• արդյունքում ունենում է ինքն իր, հարազատ մարդկանց, ընդհանրապես կյանքի լավատեսական և ուրախ ընկալում.
• մեթոդի արժանիքներից են սոցիալական և տարիքային բոլոր խմբերի համար հասանելիությունը, լեզվի պարզությունը, համակարգային մոտեցումը և կարճատևությունը:

Նյութը պատրաստեց հոգեբան Աննա Առաքելյանը