Ինչպե՞ս հասկանալ, որ դեռահասը սկսել է թմրանյութեր օգտագործել

Սովորաբար թմրանյութերով մարդիկ տարվում են դեռահասության կամ երիտասարդության  շրջանում, քանի որ այն համարվում է ավելի բարդ ընթացք մարդու կյանքում դեպի հասունություն: Այդ է պատճառը, որ ծնողները պետք է հնարավորինս շուտ հայտնաբերեն թմրանյութով տարված դեռահասին: 

Թմրանյութ օգտագործելու ցանկություն կարող է առաջ գալ բազմաթիվ գործոններից՝ օրինակ ընտանեկան բարդ հարաբերություններից, երբ ծնողները չափազանց խիստ են և պահանջկոտ, բարդ են հարաբերությունները հասակակիցների հետ, նպաստում են նաև հոգեբանական խնդիրները կամ պարզապես հետաքրքրասիրությունը:

Դեռահասը, որը օգտագործում է թմրադեղեր, փոխում է իր հաղորդակցման ձևը, վարքը, որոնց շնորհիվ ծնողը կարող է գլխի ընկնել երեխայի վիճակի մասին:

Ծնողները, որոնք քիչ են տեղեկացված կամ ուշադիր չեն, իմանում են կախվածության մասին միայն այն ժամանակ, երբ արդեն վիճակը բավական լրջացել է:

Ստորև ներկայացնում ենք մի քանի կետեր, որոնց ուշադրություն դարձնելու շնորհիվ ծնողը կարող է հասկանալ՝ արդյոք երեխան օգտագործում է թմրանյութ, թե ոչ:

• Երեխան, ում ընկերներին դուք մշտապես ճանաչե եք, այժմ ձեռք է բերել նոր ընկերներ, որոնց հետ հրաժարվում է ձեզ ծանոթացնել: Դադարել է շփվել հին ընկերների հետ, որոնց հետ թվում էր,թե անբաժան են: 
• Դեռահասը դադարում է հետաքրքրվել դասերով, հետ է մնում իր հասակակիցներից: Չի զբաղվում այն ամենով, ինչ նախկինում նրան անչափ հետաքրքրում էր: 
• Դեռահասը հաճախ է ստում, ընդ որում, նա չի էլ փորձում համոզիչ երևալ:
• Հաճախունենում է տրամադրության տատանումներ, կարող է դրսևորել անհարկի ագրեսիա:
• Դեռահասը քնում է ամբողջ ցերեկը, իսկ երեկոյան սովորաբար տանը չի լինում: Կարող է հանկարծակի անհետանալ:
• Դեռահասը շատ արագ է խոսում, կամ հակառակը՝ արգելակված է, խոսքը դանդաղ է:
• Դեռահասը կարող է օրերով ոչինչ չուտել, այնուհետև հայտնվել «գազանի» ախորժակով:
• Նա կտրուկ նիհարում է, կամ հակառակը՝ քաշ է հավաքում:
• Ձեր տանից անհետանում են թանկարժեք իրեր, ոսկեղեն, գումար:
• Տանը հաճախ եք գտնում ներարկիչներ, անհայտ ծագման դեղեր:

Շատ կարևոր է նաև ուշադրություն դարձնել դեռահասի արտաքին տեսքին՝

• Նա ունի տարօրինակ հայացք, հաճախ աչքերը կարմիր են:
• Դեռահասի դեմքը գունատ է
• Փչանում են ատամներն ու մազերը
• Դեռահասը սկսում է հագնել երկարաթև շապիկներ, թաքցնում է ձեռքերը, որոնք կապտած են ներարկման տեղերում:
• Ունի անփույթ, թափթփված տեսք:

Եթե դեռահասի մոտ նկատելի են այս նշանները, ապա կարիք կա դիմելու համապատասխան բժշկի օգնությանը: Կան խնդիրներ, որոնք հաղթահարելու համար միայն կամքի ուժը բավական չէ, այնպես որ, դադարեք մեղադրել ձեզ և ձերերեխային ստեղծված իրավիճակի մեջ, զինվեք կամքի ուժով և համբերությամբ:

Ալիսա Խաչատրյան